الخميس، 2 فبراير 2012

فوق السحاب

 عايش فوق السحاب  
 فى دنيا جديدة خالية من السراب 
 عايش وروحى بترفرف مع الأحباب  
 شايفكو ذكرى فى عيونى ليوم الحساب 
 عايش وقلبى فرحان رغم الغياب  
 الرفقة حلوة ماليانة عطر وشباب  
 كنا عصافير حزينة لما غدرو بينا  
 البسمة كانت صوتنا بيهزعرش المدينة
  الدمعة جوه بيوتنا قاسية علينا
 شوفنا نور الشمس غمضنا عنينا  
  طلع النور روحنا هى بتدفينا
 حب ساكن جروحنا شايلينه بين ايدينا  
 شايف الجبال  قمم من غير سفوح 
 نسيت الهم فجأة طريق من غير جروح   
 انكشف السر عندى والوقتى أقدرأبوح  
 سلام من غير عدل هو سلام مدبوح 
 طريق الظلم عمره ماللحق يروح  
  إنتو الوقتى عندى شايفكم فى الطريق  
 اوعى عيونكو تبكى أنا هافضل الصديق  
 زمانى هنا عدى زمانكو ليه بطىء  
 هاشوفكو يوم فجأة إوعو تضلو الطريق 
 هافضل هنا عايش  
 عايش رغم الغياب  
 عايش عالى فوق  
 أعلى من السحاب   

ليست هناك تعليقات:

إرسال تعليق